TIMBWILI LAIBUKA KANISANI!!..WAUMINI WAGAWANYIKA PANDE MBILI!!!

Kwa mujibu wa chanzo chetu ndani ya Kanisa hilo lililopo eneo la Maliasili, mgawanyo wa makundi hayo umesababishwa na watu wawili, mchungaji wa siku zote aliyefahamika kwa jina moja la Samweli na mwanamke mmoja ambaye hakufahamika jina lake mara moja.
“Huyu mchungaji wa siku zote ni mtu mstaarabu sana, hana maneno na mtu, lakini huyu mwanamama ni mtata kwelikweli,” kilisema chanzo hicho.KATIKA tukio lililowaacha watu midomo wazi wasiamini kilichokuwa kikitokea, waumini wa Kanisa la Moravian Usharika wa Boko nje kidogo ya Jiji la Dar, walishuhudia timbwili la aina yake, baada ya waumini kugawanyika pande mbili na kuanza kuvurumishiana makonde wakigombea madaraka.

Chanzo chetu hicho kilizidi kutiririka kuwa, sakata la kugombea madaraka katika kanisa hilo lenye jengo dogo na waumini wachache, limeanza kiasi cha wiki nne zilizopita, hadi kufikia mzozo huo kusababisha mgawanyo wa makundi mawili, kila moja likiwa na muda wake wa kufanya ibada.
Kuonyesha kuwa shetani amekuwa na nguvu kubwa katika jumuia hiyo ya kiroho, makundi ya wafuasi hao wamekuwa wakifanyiana visa, kiasi kwamba kundi mojawapo linapowahi na kufanya ibada, hufunga mlango kwa kufuli aina ya solex ili kuwazuia wenzao kufanya maombi na hivyo kuzidisha uhasama kati yao.
Kwa mujibu wa mnyetishaji wetu, mchungaji anayejulikana na kukubalika na wengi ni Samweli, ambaye kwa muda wote ndiye amekuwa akisalisha kanisani hapo, tofauti na mama huyo anayedaiwa kuwa ni mkorofi.
Hata hivyo, katika hali isiyotarajiwa, baadhi ya waumini waliotengana waliamua kumaliza tofauti zao na hivyo kuanza kusali pamoja, hali ambayo badala ya kuleta amani sehemu hiyo takatifu, ilizidisha tafrani na kusababisha kuzuka kwa ugomvi uliosababisha baadhi ya viongozi wa kanisa hilo kuchaniwa mashati.
Inadaiwa kuwa, kundi linaloongozwa na mwanamke huyo ndilo tata kuliko lile la mchungaji, kwani upo ushahidi wa wazi kuwa amekuwa akiwaleta watu ambao siyo waumini ili walete fujo kanisani.
Baada ya mvutano wa muda mrefu wa kupigana, kutukanana, kuchafuana na kuchaniana nguo, hatimaye Polisi wa Kituo cha Wazo Hill, walifika eneo la tukio na kumaliza ‘soo’ hilo kwa kuwakamata na kuondoka na watuhumiwa pamoja na baadhi ya waumini.
Hata hivyo, Mchungaji Samweli ambaye naye alikamatwa, aliachiwa baada ya kumaliza kutoa maelezo yake.