BRAKIN NEWZZ!!:- HATIMAYE MAWAZIRI WA SERIKALI YA RAIS MKAPA LEO WAMALIZA RASMI KIFUNGO CHAO SOMA HAPA LIVE!!

Aliyekuwa Waziri wa Fedha, Basil Mramba na Waziri wa Nishati na Madini, Daniel Yona katika Serikali ya Awamu ya Tatu,

leo wanahitimisha kifungo cha miaka miwili, ambacho kilichoambatana na kifungo cha nje cha kufanya usafi. Mramba na Yona wanamaliza kifungo hicho leo baada ya kufanya usafi kwa saa nne kila siku kwenye hospitali ya Palestina, Sinza, Dar es Salaam, kama walivyopangiwa na baada ya hapo watakuwa huru uraiani.

Awali mawaziri hao wa zamani walitumikia kifungo cha miaka miwili jela, lakini baadaye walibadilishiwa kifungo hicho na kuwa cha nje, baada ya kuonesha utiifu gerezani kwa kufanya kazi walizopangiwa kwa bidii. Baada ya tathmini ya utii wao iliyofanywa na Jeshi la Magereza kukamilika, Mahakama ya Hakimu Mkazi Kisutu ilibariki uamuzi huo wa   kupewa adhabu ya kifungo cha nje.

Hakimu Mkazi Mfawidhi wa Mahakama hiyo, Cyprian Mkeha alisema sheria ya huduma kwa jamii namba sita kifungu namba 3(1) ya mwaka 2002, inasema mtu anayetiwa hatiani kwa kosa ambalo adhabu yake ni miaka mitatu kurudi chini, Mahakama inaweza kumpa adhabu ya kutumikia jamii. Mramba na Yona baada ya rufaa walibaki na adhabu ya miaka miwili, ambapo walitiwa hatiani kwa kutumia madaraka vibaya na walipaswa kumaliza kifungo mwezi huu.

Hakimu Mkeha alisema Magereza walifikisha barua mahakamani hapo Desemba 5, mwaka jana, wakipendekeza kifungo cha nje kwa mawaziri hao. Kwa mujibu wa hukumu hiyo ya Mkeha, baada ya kupokea barua hiyo Mahakama iliamuru watu wa huduma za jamii kuchunguza kama wanastahili kupewa adhabu hiyo na baada ya uchunguzi walirudisha ripoti kwamba wanastahili.

Hakimu Mkeha alisema vigezo vya kupewa adhabu hiyo ni umri mkubwa ambapo Mramba na Yona wana umri wa miaka 75 na kama wahusika ni wakosaji wa mara ya kwanza. Kigezo kingine ni kama watuhumiwa walijutia kosa lao na kukubali kuitumikia jamii bila kulipwa, kuangalia umbali wanakoishi na eneo wanalokwenda kufanyia shughuli za kijamii na tabia za washitakiwa.

Hakimu Mkeha alisema sheria haijapendekeza makosa yapi wasipewe kifungo cha nje, isipokuwa imetamka kwa yeyote aliyefungwa kuanzia miaka mitatu kushuka chini. “Mramba na Yona baada ya kuridhika kwamba wanashitakiwa, wamepangiwa kufanya usafi hospitali ya Palestina Sinza kila siku na watatumikia hadi Novemba 5. Watakuwa wanafanya kazi kwa saa nne,” alisema Hakimu Mkeha.

Julai 6, mwaka jana Mahakama ya Hakimu Mkazi Kisutu iliwahukumu kwenda jela miaka mitatu na kulipa faini ya Sh milioni tano, huku ikimwacha huru aliyekuwa Katibu Mkuu wa Wizara ya Fedha, Gray Mgonja baada ya kumwona hana hatia.

Walikuwa wanakabiliwa na mashitaka ya matumizi mabaya ya madaraka na kuisababishia Serikali hasara ya Sh bilioni 11.7 kwa kutoa msamaha wa kodi kwa kampuni ya kukagua madini ya dhahabu ya M/S Alex Stewart ya Uingereza.

Hukumu hiyo ilitolewa na jopo la majaji watatu, Saul Kinemela, Sam Rumanyika na John Utamwa, aliyekuwa Mwenyekiti wa Jopo hilo.

Kwa mara ya kwanza washitakiwa hao walifikishwa mahakamani hapo mwaka 2008. Hata hivyo, Oktoba 2, mwaka jana walipinga adhabu hiyo na kukata rufaa.

Katika rufaa waliyokata Mahakama Kuu Kanda ya Dar es Salaam mbele ya Jaji Projest Rugazia, walipunguziwa adhabu kwenye kuisababishia Serikali hasara, hivyo wakabaki na adhabu ya kifungo cha miaka miwili jela kwa kutumia madaraka vibaya.

Source:- SwahiliTimes