RAIS MAGUFULI AGUSWA NA KIFO CHA SITTA

RAIS MAGUFULI ALIPOKWENDA KUMJULIA HALI 

MZEE SITTA NYUMBANI KWAKE JIJINI DAR ES SALAAM

Rais wa Jamhuri ya Muungano wa Tanzania Dkt. John  Magufuli Astushwa na taarifa ya kifo cha Spika Mstaafu na Mbunge Mstaafu wa Jimbo la Urambo Mashariki Samwel Sitta.

Mzee Samwel Sitta amefariki dunia usiku wa kuamkia leo katika hospitali ya Technical University of Munich Ujerumani alikokuwa akipatiwa matibabu tangu mwezi uliopita.

Rais Magufuli amemtumia salamu za rambirambi Spika wa Bunge la Jamhuri ya Muungano wa Tanzania Job Ndugai kufuatia kifo hicho.

kwa mujibu wa taarifa iliyotolewa kwa vyombo vya habari na Gerson Msigwa, Mkurugenzi wa Mawasiliano ya Rais, Ikulu. Dar es Salaam ambayo BLOG YA WANANCHI imetufikia Katika salamu hizo , Rais Magufuli amesema amepokea kwa mshtuko na masikitiko makubwa taarifa za kifo cha Samwel Sitta na Taifa limempoteza mtu muhimu aliyetoa mchango mkubwa katika uongozi na maendeleo.

“Nitamkumbuka Mzee Sitta kwa uchapakazi wake, uzalendo wake na tabia yake ya kusimamia ukweli katika kipindi chote alichokuwa kiongozi katika ngazi mbalimbali za siasa na Serikali.

“Kupitia kwako Mhe. Spika naomba kutoa pole nyingi kwa Mke wa Marehemu Mhe. Magreth Sitta ambaye ni Mbunge wa Jimbo la Urambo na familia nzima ya marehemu, Wabunge wa Bunge la Jamhuri ya Muungano wa Tanzania, Wananchi wa Urambo Mkoani Tabora na watu wote walioguswa na msiba huu” amesema Rais Magufuli katika salamu hizo.

Dkt. Magufuli amesema anaungana na wafiwa wote katika kipindi hiki kigumu cha maombolezo na amewaombea moyo wa uvumilivu na ustahimilivu.

“Namuomba Mwenyezi Mungu aiweke roho ya Marehemu mahali pema peponi, Ameni”